المقابلة الشخصية

المقابلة الشخصية

أول سؤال طبعا .... هروح فورمال ؟؟ أصل أنا بتخنق من الجرافته
وشششششش تروح فورمال و مفيهاش كلام لأن الناس هناك بيقيموك علي كل كبيره و صغيرة و من أهم النقط دي هو مظهرك
خليك يا سيدي قميص و بنطلون و جرافته شيك مش لازم الجاكيت عشان الحر.
(عشان هنكون في شهر 7)
و يفضل لو بالجاكيت تكون الالوان الغامقة

أنا بيجيلي حالة توتر في المقابلات عموما ... هي صعبة ؟
لا لا لا ماتقلقش و مفيش داعي إنك تتوتر لأنهم مش هيمتحنوك لأن المقابله هدفهم منها إنهم يتعرفوا عليك كشخصية و طريقة كلام و طريقة تفكير.
المهم بس يلاقوا عندك صبر و إنك تعرف تتعلم تحت ضغط

يعني إيه المطلوب بالظبط ؟؟
مش مطلوب منك إنك أي حاجه غير إنك تكون علي طبيعتك عادي جدا
مع العلم ... ماتحاولش تهزر إلا لو اللي بيعملك الانترفيو بدأ و برده ماتبالغش في الهزار
بلاش تتعصب أو ترد علي سؤال بأستخفاف أو إسهزاء لو كان حتي السؤال سخيف
يعني لو جه قال لك مثلا إنت شكلك مابتفكرش و دماغك علي طول واقفه
ماتدخلش شمال في الراجل عشان مايقلكش نشوف وشك بخير، خد ثانيتين فكر و رد عادي.
بلاش عصبية – بلاش إندفاع – بلاش إستخفاف دم كتير

بيكون كام واحد جوا و هل بنكون مجموعو مع بعض بتعمل الانترفيو؟
لأ يا سيدي هتكون لوحدك
و العدد بتاع الناس اللي بتعمل لك الانترفيو علي حسب نوع الانترفيو
بس معظم الانترفيوهات بتكون مش أقل من 3 و ساعات بيبقا ربنا كاتب لك
إن واحد بس هو اللي يعمل لك الانترفيو

يا تري هل هو إنترفيو واحد؟
إنت هيكون عندك إتنين ثابتين
واحد في التراك اللي إنت كاتبه في الرغبات و التاني اللي هو السوفت سكيلز soft skills
و عدد الانترفيوهات بتزيد علي حسب عدد التراكات
مثلا : رغباتك SE-Multimedia-ELearning
هتعمل إنترفيو عن الرغبه التانيه و التالته

كنت هنسي ... هما هيسألوني في إيه في كل واحد؟؟؟
بالنسبه للتخصصات : طبعا إسمك و خريج إيه و تقديرك و ليه عايز تغير المجال 
هيسألوك عن مشروع تخرجك بالنسبه للأسئله المختصه بالتراك اللي انت بتقدم عليه و ليه إختارته
هيسألوك بس لو إنت قلت إنك بتفهم فيه و لو حاجه بسيطه
بالنسبه للسوفت سكيلز : أولا ده هيكون كله بالانجليزي، هما هيسألوك عن شخصيتك و ممكن مواقف لو إتحطيت فيها تعمل إيه و طبعا شوية puzzle حلوه كده
بالاضافه بقا للأسئله المعتاده اللي هي نقبلك في الدوره ليه و عملت إيه من ساعة ما إتخرجت و حاجات من دي.

يعني هعرف أدوس و أعدي إن شاء الله ؟؟
تدوس ؟؟ إنت شكلك ناوي تدخل تقول أي كلام عامل فيها أبو العُريف
خلي بالك إن اللي بتعمل معاه الانترفيو عارف كويس كل حاجه في التراك
يعني لو بتفتي هيحرجك و يقول لك إشرحلي
فبلاش تتمنظر علي الراجل ال يعني إنت بقا أبو العريف اللي في القعدة
لو إنت عارف قول مش عارف ماتقولش ، مش عيب و مش دي اللي هتخرجك من المنحة

الله !! طب أنا عارف حاجات بس مش قوي
قول له بكل بساطه انا أعرف في لغة البرمجه الفلانية دي و دي و دي
يعني تقول له إنت عارف إيه بالظبط عشان مايدخلش معاك في متاهات إنت مش قدها

هو الكلام ده كله هيكون بالانجليزي
لا لا هو تقريبا التعريف بنفسك هو اللي هيكون إنجليزي
الجملتين اللي بتسمعهم في كل إنترفيو
My name is….I live in…I was graduated…
و ممكن سؤال كده و لا إتنين زيادة إنجليزي لكن الباقي عربي

هو فينا من حركات توقيع و كده؟؟
اه طبعا !! هما عايزين ناس واثقين من نفسهم و من إجاباتهم يعني خليك واثق من إجابتك بس ماتكنش بتفتي

أنا خايف لمتقبلش عشان أكيد في ناس أحسن مني ... هو في كام واحد بيقدم معايا ؟؟
في التقديم يا سيدي ممكن يقدم 10 الاف واحد
الف فقط هما اللي يتقبلوا
لكن إووووعي بأي شكل من الاشكال تفكر كدة
أولا لأن دي أرزاق و ربنا كاتب لكل واحد نصيبه
ممكن تلاقي حد عبقري مايتقبلش و واحد مايعرفش حاجه و يتقبل
لأن هما مش بياخدو مين اللي بيفكر أحسن في عوامل كتير زي الاخلاق و الشخصية

اللي ممكن يدخلك ممكن تكون طريقة كلامك و أخلاقك بصرف النظر عن إنت فاهم في إيه

درجات الانترفيو بتتحسب إزاي؟؟

السوفت اسكيل : 25%
درجه التركيز وهدوء الاعصاب : 25%
الاسئله التكنيكال : 50%
ودا لخريجين قسم الكمبيوتر

النتيجه النهائية بتكون إمتي بقا ؟
دي غالبا بيحددوا ميعاد مثلا علي أول شهر 9 و نتيجة الناس كلها بتظهر سوا
و طبعا بما إن هيكون في أسماء كتيييييير أوي فأنجز و دوس علي ctrl+F
و إكتب إسمك و شوف موجود ولا لأ في الصفحة
مالقتهوش جرب بقا تقرا إسم إسم عشان ممكن يكون مكتوب بس بحروف مختلفة

أعرفها برده من الاكونت بتاعي ؟
كده كده أسماء الناس اللي إتقبلت في المنحة هتظهر علي الموقع نفسه و إنت تشوف إسمك في الكشف زي نظام نتيجة الكليه كده لما تدور، بص برده علي الاكونت مش هتخسر حاجه

أصل النتيجه أكيد لو هتطلع علي النت الموقع مش هيفتح من كتر الشعب اللي عليه صح ؟
بالظبط كده !! زي نتيجة الثانوية العامه و الموقع مش هيفتح فهيكون عندك حاجه من إتنين
يا إما إنت لو عرفت تدخل علي الموقع هات الاسماء و حطها علي المنتدي
أو لو مش بيفتح حط إسمك و الكود بتاعك و تراك إيه اللي إنت مقدم فيه و في أنهي فرع.

و لما ربنا يكرمني و أنجح إن شاء الله ؟
يبقا الف الف مبروك و هتلاقي متحدد كيعاد علي الموقع بيقلوا لك فيه تروح تقدم الاوراق الاصلية بقا
اللي إنت قدمت صورها لما كنت بتمتحن

في حاله إني مانجحتش خالص بقا في النتيجه ؟
ماتزعلش و خليك متفائل !! و دور علي منح تانيه و في منح كتير علي فكره بس إنت دور
أو تكون من ضمن الـWaiting List دي و يكلموك عشان الناس اللي بتمشي قبل بداية المنحة